Nachricht vom 19.05.2021 
De Steejesch Add - e Lewe met on füä et Fahrrad
GASTBEITRAG | Höüt fezeele esch fon änem, dä sesch et ganze Lewe met Fahrrädä ausenannä gesätzt hät. Hä es bekannt, bie en bondä Hond on höscht Adolf Steger, em Dorf soon se owä all, de Steejesch Add. Esch ben oft met em Mauntenbaik en oosem Wald onnäwees on dobai sään miä oos oft.
Neuwied. De Add es mettläwäil 92 Joä alt, odä bässä gesoot jong. Wänn et Wedä metschpillt, es hä jeden Daach ömmä noch zwai bes drai Schtonn, met säinem Drairad (E-Baik), of Tuä. Onnäwees rafft hä em Wald noch Holzknöppele off on feschtocht sä en säinem Owe. Bläift owä onnä oos, obwohl de Förschtä Beschäd wäs. Füä dä Laisdung, en demm Aldä, kann mä de Hoot zeje! Owä bie hät dann alles begonne?
Gelieed hät hä bäim Winklä on Dönnebiä en Nöiwidd, owä säin ware Liebe woren ömmä de Rädä. Newä de Arwäit hät de Add bäi Runkels Karl en Owäbiewä geholewe, Fahrrädä on spädä och Motorrädä, tse flegge. Dat woä säin Lewe on hät em Add Schpass gemacht. Gewoont hann Steejesch fröhä en de Nerregass 1 (höüt Blockäschtroos) newä de Bäckäräi Owäreuther. De Add hät ömmä fon em ejene Laade getröömt. Aines Daachs koom Märls Joba en de Bäckeräi on hät em Add en Wutze- on Pärdeschtall bäi säinem Brodä, de Bauä Märl, en de Kärschschtroos (höüt Hauptschtroos) angebote, öm doo off ejene Kapp, newä säine Arwäit bäi Winklä on Dönnebiä, Rädä tse flegge.
1952 hät hä domet angefange, dänn Stall off Foddämann tse bränge. Et koom dä Daach, do hät hä kään Loost mie bäi Winklä on Dönnebiä gehat on es, bie säine Faddä, met em Motorrad üwä de Dörfä gefaare on hät Mostä (Senf) fekorft. Dat wor e good Geschäft on dobai hät hä noch säin Frau, et Marlene, en Ängesch känne gelieed. Die hät doo en de Apodeg gearwäit. 1954 hann se dann gehairot. Am zwaite Januar 1953 wor et dann suwait. De Add hät newä em Lewensmettellaade Owädriese, gänerüwä fon Wainands, die Schulsache fekorft hann, säine Laade ofgemacht. An de Hauswand hät hä en Schaukaste offgehange on de ürschte Wärbung hät gehööscht: Häste mo däin Fahrrad platt, komm schnäll zoo Steejesch Add.
Anfangs hät hä do nuä Rädä gefleggt on et säin fill Löüt komme, wail fast jedä met dem Rad off de Arwäit gefare es. Mansch ännä koom och nüä öm tse schnääse. Dat wor em Add owä igal, Gesälleschkait hät domols em Foddägrond geschtanne, wail de Löüt schwäre Jore hinnä sesch hatte. En dem Laade es fill geschwätzt on gefäijet wure, on mansch ännä wost tso spätä Schdonn nimmi, bie hä haimgekomme es.
Aines Daaches es em angebote wure, moo e Motorrad austseschtälle. Dat hät hä dann och gemacht. Et hät net lang gedaued, do koom de Schräinä, Diesesch Ed, en de Laade on hät dat Motorrad gekorft. Dat et bäim Add nau och Motorrädä gorf, hät sesch schnäll rond geschwätzt. Wänn en nöüije Laadung ankoom, hann de Löüt schon em Hoff geschdanne on gewaad. De Zait hät et met sesch gebraacht, dat de Motorrädä de Fahrrädä de Rang abgelowe hann. Owä de Add hät sesch dofonn net feröggt mache losse, on es em Rad ömmä träü bliewe, dat wor säin Wält.
Met de Tsait es dä Laade en de Kärschschtroos tse klään gewure on Anfang de seschzijä Jore hät de Add met säine Frau en de Onnäbüngschtroos e Haus met Laadelokal gebout. Do säin Fahrrädä, Mopeds, Motorrädä on Gaadesache, bie Raasemähjä, fekorft on gefleggt wure. Owä ooch doo es et met de Zait tse kään wure on de Löüt, die drömerömm gewoont hann, mussden fill Krach on Fekeeä ertroon. Dann hät sesch de Add em Ängijäweesch en Hall angemiet, die irjendwann owä ooch aus all Nööt geplatzt es. Et hät sesch dann die Gelejenhait ergewe, noch e Grondstög do onne tse korfe on dat hät hä och gemacht. Doo es höüt noch de Laade on säin Wohnung. De Add hät ömmä Mopeds, Motorrädä, Forst- on Gaadegeräte fekorft, owä säin ware Liebe es on bläift et Fahrrad. Domet es hä gruus gewure on dem hät de Add och fill tse fedanke. Add, et hät mesch gefröid, es besje aus däinem Lewe tse fezeele.
Esch ben ömmä fruu, desch em Wald tse sään, dann wäs esch och, dat es diä good gäät. Nochemoo, de Add es 92 Joä alt/jong on ömmä noch jeden Daach zwai bes drai Schtoon em Wald onnäwees. Dat muss mä tse üescht moo noomache. Esch of jeden Fall zejen den Hoot.
(Reiner Bermel)
Lokales: Neuwied & Umgebung
Feedback: Hinweise an die Redaktion
